弊 hell

昨晚，表妹結婚飲宴完畢，回家巴士上。

佐治：嘩，點解巴士個電視 "done(第3聲)" 極都唔壞既？啲機器呀"done(第3聲)"兩"done(第3聲)"就壞架喇...

我：佢播碟架，唔係收台果ｄ電視呀。

佐治：唔係喎，成日 "done(第3聲)" ，真係弊 hell 架...

我：（轉移視線）咁弊hell 個 hell 字點寫架?

佐治：弊 hell 即係唔妥當囉，唔識寫查字典啦，字典實有。

我：真係唔識寫個 hell 字...

佐治：咁有音架嘛，寫個音囉，嘿，弊 hell 你都唔識，弊 hell 喎，形容詞呀。

我：$^#@%$!$#@#%

Read More

Iphone 5 的故事

其實我哋 team 經常都好歡樂，由上至下打成一片。

話說，同事B助教極好彩，於 Iphone 5 開售第一日就抽中。
咁有第一手消息，梗係宣揚開去，通知上完 live 嘅天王大人。
此舉務求舔走佢啲甜醬。 XD

正當我與組長M 都以為 B會留返一部畀大王...
冇理到件事，第二日再努力申請。

點知...
慘劇就係咁發生喇....

B放晒兩部機之後，大王先搵佢...=_=
咁橋，神奇既 B仲要跟當日 Live 班...

條友仔，一見到大王，就拎個裝 Iphone 5 嘅袋畀大王...
大王心諗：「咁好？」

但一開袋...
「唓.....」=,= =,= =,= =,= =,=

作死！原來入面係...

P.S. 1：以上故事係由當事人 whatsapp 即時報道。
P.S. 2：忍咗幾日至 video 開始出街先寫 XD，而此逸事於 2012-2013 年度第一堂播出，應該一個 centre 播至少廿次，約有一萬人見證。 =__,= 但我見到 ipod 5 果頁已經忍唔住狂笑。
P.S. 3：可能係報應，本人抽了六日都未中.......

嗚呀...

Read More

勞力是無止境

佐治將來會留給我的，會是公屋戶籍，還有一隻勞力士 air king。
至於為什麼不是巨額存款，我可以告訴你，佐治是一名不折不扣的及時行樂者，有錢佢會用來食、買衫 (係...呢個阿伯真係成日都買衫.....)、舖草皮等等，其他的當年交由先母扣起。現在小人謹守先母遺訓，給佐治足夠的家用就好，不要祈望要動用巨款的時候佢會救到自己。 =,=

好了，我承認我對隻 air king 一虎視眈眈，而一講錶佐治會上身怒講野。
有時食飯冇公司趣事分享，就是但拎住份副刊大叫「嘩，隻錶要咁貴架?!」引入話題萬試萬靈。

話說，當年買入 air king 只是 $900，乃當時George 的一個月人工，先母為此事媽叉了他三十多年，因為買錶冇飯開....-_-|||

嗯，而家一隻大約四萬。

佐治話果時喺波斯富街間瑞士表行買，而家間野都仲喺度。
我問佢，咁點解唔買有日曆果隻既 ?! (如下圖)

佐治：「個售貨員話喎，有日曆果啲一壞，好大件事，冇日曆果啲襟好多又冇咁易壞又冇咁貴嘛。」

呢啲咪就係貴買平著的智慧與人情味之嘛。

Read More

懶人之選：咖哩叉燒飯

話說，呢排又開始返要sit 堂 play碟嘅生活...
咁慳錢的小孩早一日煮定個飯盒好正常。
（上個星期好勁，只係用左400 蚊!)
尋日個飯食咖哩薯仔雞翼。

煮開，一定煮唔到只係一個人既份量...
咁煮埋佐治份晚餐啦。

個死lan 仔...話唔想食龜翼...但又想食咖哩薯仔紅蘿蔔喎...

結果佐治發明新食法！

咪就係...

去買個叉燒飯走汁

然後

煮返熱D咖哩薯仔紅蘿蔔
淋落盒飯面...

Ta da~~

咖哩叉燒飯

完成！

p.s. 1: 嗯...成件事.....其實係放工返屋企...佐治描述返我聽...一..一
p.s. 2: 我本來想加圖...但我真係搵唔到圖........=,= =,= =,= =,= =,=

Read More

譚耀宗與大力針

(圖為皇上無話兒劇照，主角係 King George VI)

由於朋友們都很愛我家的佐治(即係我老豆) 亂講野...有時係冷知識，有時係小智慧，有時係真係亂講...
真係捉唔到路....
於是搬埋黎個blog呃收視 ，希望有日好似卓韻芝阿婆金句咁多人like。

講起電視，佐治慣左睇住電視，但唔跟劇情不停講野，好彩佢個女我識一心二用，一邊睇字幕一邊應佐治機。
_______________________________________________________________________
場景一：星期日．茶樓．城市論壇

我：「長毛大戰譚耀宗呀，好睇喎，嘩，遲下上網睇返先！」
佐治：「你知唔知譚耀宗以前做咩架呢？」
我：「我好似一直都只係知佢係左派議員咋喎...」
佐治：「佢呀，以前喺中國國貨公司做櫥窗設計架，唔知呀呢~」

吓?! 譚耀宗係window display designer ?!?!?!?!

好，去左譚耀宗個人網頁睇
譚耀宗於1949年在香港出生，在香港接受教育，年少時投身百貨業。1968年，加入百貨業工會，正式開展工運生涯。譚耀宗於70年代致力於工運，關注工人權益，1975年當選為百貨業工會副理事長，成為工會的青年領袖。1980年加入工聯會任職工人俱樂部主任，全職投入工運工作。

嘩，又真係百貨業喎！估你唔到 O_O

_______________________________________________________________________

場景二：星期一．天梯．岳華&雪梨就死

我：「點解油盡燈枯會係死因黎架......你話中暑死我真係ok 架。」
佐治：「嘻，實係個大夫唔識醫啦～打技大力針會救到架嘛。」（但果個係中醫一..一)
我：「你...係唔係想講...強心針..」一..一
佐治：「哈哈哈個心大力D呀...」
佐治：「唉 (突然感嘆) ，邊有咁啱架，梗有一個走先架啦，唉。」

但係...腎上腺素又好似真係會令人大力左...(!) =_=|||

Read More

公民再教育

我會努力唔用粗口黎講呢一日既事，因為已經非常摟摏。
又係 OMG 做既好事...
ＯＭＧ個人真係自私到呢....
(真係唔關佢任何工作表現事，我真係純人身攻擊。)

今朝一返公司，冇冷氣、冇電腦、冇網上...
因為個死人冷氣又漏水...
D水浸到有電既野而跳fuse..............

咁一個正常既人，一定係熄左D野先，抹乾D野，開返個電掣。
so simple!
OMG 全程企響道等D 女同事整.....
你幫手遞紙都唔緊要，唔出聲冇人話你啞架...
仲要一臉驚電死咁...
仲要次次都係咁....
有次真係要塞個地拖畀佢先知要抹地呀............
好啦...有勇者返黎整返打左柴既router 同善後啦....
佢仲要夠膽笑人。
而家唔係人笑你就笑得，你乜都冇做過仲笑人，係唔係人呀....
咁好啦，有電，但都唔敢開冷氣。

*食飯喎
咁OMG 食沙爹牛肉串加麵。
精彩囉，佢想唔用手掂支竹籤又食要個牛肉。
用筷子夾住，想用匙羹爬D肉出黎。
但同時，佢係整到碟野差D跌，而一跌，我會變成沙爹既一部分....
咁梗係推佢碟野入D啦，佢已經好唔妥咁樣。
另一同事叫佢用手拎住黎食唔好周圍彈汁...
嘩佢囂張到話：「我唔想用隻手掂到Ｄ汁」
用紙巾啦頂......
仲要見住佢D指甲長到丫........佢隻手點都污糟過D野食囉唔該。
真係冇求生基本技巧架........

好啦，食完飯，咁要行返入商場返公司。
行入去果時，見到有人推輪椅要出...
OMG 佢個cheap 人，佢明明企最近道門，頂住都唔係好難咋下嘛....
佢個人粉！佢閃．開．左．架．輪．椅．呀
我好彩即時行返轉頭頂住道門咋....@@*

我同另一同事真係忍個人粉唔到，又由於OMG 去左禁機....
一上到去我地忍唔住要講返佢件「華麗轉身」事蹟。
講講講，是非就自然唔好聽。內容係 repeat *段
加左句: 我真係想鍊死佢!

好喇，劇情比 TBB 更 TBB，佢返入黎，用近似捉到我既痛腳既語氣同我講:
「我聽到你頭先講乜，你要鍊死我當面講有咩唔妥囉，你響背後咁講，我好失望。」

烈女性格如我，就兜．口．兜．面同你隻OMG講你有咩唔妥！
內容都係 repeat *段
佢話我唔諗分開豬扒會整到佢
頂丫，豬扒仲dry過我，我會成塊飛埋你道咁蹝咩?!
佢口震震話：「我睇唔到架輪椅，可能分左神...」
昆我盲呀? 睇住佢閃開會睇唔到?!
OMG然後 hea 話下次會注意...

但係，一眾同事都認為佢個人根本冇進步過。
仲要佢D timing 夾到....擺明係聽完先入黎....
聽完咪算囉，仲要以為我會因為講人是非畀當事人偷聽到而收聲。
我估係我會兜．口．兜．面再講多一次。

但個問題係，個人粉自己有問題而唔知呀.............
仲要佢成日站響道德高地黎話人，但其實基本待人處事都好有問題。
吼，噴完火。

Read More

公民教育

登場人物簡介：

OMG

專業的「話題終結者」。一個有唔知邊道黎既自信覺得自己講既野一定有道理，仲一定有邏輯既人。自命飲到 cheap 紅/白酒會倒左佢。睇電視只會睇 national geographic 同 discovery channel，但佢會偷睇小丸子同文地貓。奉古典音樂為高尚品味，但明明見佢聽secret garden 同 日本動畫 BGM。專長係跳掣，突然亂講一通扮蟹，寫wiki 有關高達條文。其打扮為全身 earth tone.... 戴銀絲眼鏡，仲白過我。會大叫曬太陽會曬傷。最大敵人係醋，最好既朋友應該係公司樓下藥房隻冇左下巴既貓。口頭禪為拍檯大叫oh my god，因此得名 。
_________________________________________________________________

尋日為投票日，一返公司OMG 就問我有冇投票。
我身為鍵盤戰士，都有十二點前投票架~
仲做埋民調支拎龐愛蘭同劉江華添，我上屆投劉江華架，佢真誠為香港！

我答:「有呀，唔係唔投下嘛?」
當時小人睇新聞睇到眼濕濕，見到生果日報寫D核突人既賤招嘅時候...
隔離位的同事OMG...用巧威威既語調同我講：
「我成家人都冇去投票喎，我唔係mandatory*要投架喎。」
我:「投票唔係公民義務黎架咩？」
OMG ：「唔係mandatory要投架喎，總之我唔係mandatory。」
*mandatory 指法律上強制的。

我心中暗火：「當議會已經係最有民意基礎既地方，但政府政策都係可以將佢既權力架空既時候，我除左投票，真係唔知可以再做到咩野維護自己既意見。」

OMG突然收起巧威威的語調，去左迷思mode。

我心諗，頂我唔想晨早流流要同你講咩法律其實係道德既底線呀，咁法律冇叫你食飯你又食? 若然法律寫明強姦隻牛冇罪既話你又去強姦隻牛喇咩....

然後過左3分鐘，OMG 講: 「啊，不愧你做 idea bank*。」
*idea bank 乃小人有份的著作，主要內容係貨真價實既時事多面睇。

頂，佢真係跳線架，兩樣野都唔關事既！！！

冇呀我想講一樣米養百樣人，真係仲有人覺得政治係唔關自己事架！明明政治就係最大既經濟，牽一髮動全身。即係簡單 D講，要你一定學普通話都係一個政治決定，因為語言係身份認同既最有效工具。個火車站起響邊，條路擺邊，都係！咩唔係呀?! 你唔見到人地用成功爭取巴士要兜晒成個粉嶺叫做政績咩？

好似幾好笑，但個幽默係黑色架....
只要年輕一代都好似 OMG 咁覺得政治唔關自己事，真係畀人食左都唔知，到時聲都冇得聲喇。

但願OMG 的同類都有人令佢去左迷思mode。

Read More

[置頂] 2+2= 國民教育

(寫於7月17日)
大家一睇到題目，相信都會毫不猶豫咁答：「４！」
但，喺洗腦教育之下，2加2，係可以等於5，甚至6。

正如大話講100次，所有人都會信以為真。
而大話再加上權力，我不敢想像。

掹車邊身為一名從事教育業的小螞蟻，我不怕國民教育。
但最好唔好有呢一科。

只因為，我們的自由度較高 。
或者，是天王大人的「敢教日月創新天」令我們可以創意無限地跟課程玩遊戲。
我不知道寫的教材，我們的想法，會有多少學生看到。
我只知道，靠自己的一點能力，用暗力滲進一些我所相信的原則、分析角度等。
沒有絕對，只有對照，要選那一方都可以是道理。
(係呀我講緊本 Idea Bank 呀~ 黎緊書展出2 呀~~可以買埋 1睇下架~)
而我知道，好多同事都做緊呢樣野。
唔理有冇人睇，做左先。

洗腦，如果係真理，好似 D grammar rules 咁，冇問題架。
但，洗腦既內容唔係真，又或者有既定立場...
咁就真係少D思考功力都搞唔掂。
之但係邏輯能力亦唔知點解係而家D學生最弱既一環。
(好多時改文都係見到D grammar 冇錯...但 logic 夾唔埋既文)

我認，我搵 sources 好多時都以無傷大雅為依歸，開開心心學到野唔好咩?
我有自我審查搵 sources 唔搞六四、唔搞大是大非。
娛樂化都係即食文化既結果。
仲要D 細既比我地更心急。
所以，呢壇野，如果真係即食，求卵其叫D學生食，佢地又真係會照吞，咁就XXXXX囉...

而家呢，就同自己講，揸緊隻宗旨，見得人拜得神。
唔好畀 1984 既世界真係出現呀。

共勉之。

Read More

嘰嘰嘰

今日我要介紹一種有小強精神既物種：
嘰嘰嘰。

嘰嘰嘰正名為嘰嘰兵，主要功能係企響主要怪獸隔離畀人打，同埋增加氣勢。
由朦面超人、恐龍戰隊至到中國超人、仲有關公大戰外星人，都有嘰嘰嘰既存在。

嘰嘰嘰多以由頭到腳加面罩全黑的造型現身。

嘰嘰嘰既對白好簡單，分別係：

1) 嘰! (用作回應主要怪獸)
2) 嘰嘰！(用作表示出擊、增強氣勢)
3) 嘰...嘰嘰... (乃嘰嘰嘰之遺言，講完呢句嘰...嘰嘰... ，嘰嘰嘰就會跌喺地下，四肢抽搐，化成一堆光，連灰都冇得剩。)

冇，我想講我生成一條嘰嘰嘰命，仲要呢兩日好清楚咁認清自己係一隻不折不扣既嘰嘰嘰。

P.S. 我可唔可以要求個面罩有閃片？製服我唔駛要 shoulder pad 喇~ 我個膊夠橫呀~ 頂得住喎。

Read More

五味雜陳

嗯，九月，又一年。
但這年我好像老了十歲。

媽媽跟我同月生日，以前總是一起慶祝。
她不在了，有時候家裡靜得可怕。
這幾天，特別想她。

_____________________________________________________________________________
媽：

我很好，也很努力地生活。
謝謝你生下了我，如果將來有孩子，我也要像你當年，給我自由，放手讓我塑造自己，也是我最親的朋友。

呀，我學會了做凍餅呀，因為費事老豆買錯恐怖cream 雜果蛋糕啦。

好彩我整左咋，佢話本來諗住買半打椰撻喎 O_O
不過未整蘿白糕呀，遲下整左擺你檯面丫。 :D
_____________________________________________________________________________

心裡的那個洞，慢慢會好。
悟到了那不可抗力帶來的錐心鑽骨。
對最親最親的人，就算再沒有面子的事我也可以做。
看到老豆食cake 食得好開心，仲話幾靚喎咁。
嗯，也許，跟他一直比較差的關係會好過來吧。
我把那些任性在對著他的時候都一一收好了。

內在很複雜的時候，再看到我城的複雜，洗版 vs 洗腦。
啊。

都會好過來吧。
以後我會分清楚，值得與不值得。
哭泣夠了，我以後要笑。

Read More

紅、黑

是黑色的紅字

是紅色的黑字

是紅也是黑

是黑也是紅

是紅與黑的黑與紅

當年的紅，成為了今天的黑。

但，
今天的黑，真身是守護未來的紅。

Read More

排骨．菜飯．拍青瓜

星期日，早放工，可以煮D 多功夫既野食~
受到大瓜樂廣告感召，好想食菜飯。
然而煮落先知功夫多到呢... (而家隻手都仲有D 攰...)
唔怪之得當年先母要小人用盡甜言蜜語先肯煮。

淨係得菜飯同排骨好似有D dry...
所以整多左個偷懶拍青瓜。

煮食筆記如下:

(1) 拍青瓜
跟 so c wong 做法~ 如下片


不過我用左一條溫室青瓜，下次要買2條，佐治狂食!!
同埋我切開左先再拍 (大佬，好似佢咁拍...最後洗廚房既咪又係我...)
最緊要校個汁既時候真係要撈勻試清楚~
太酸加糖...同埋一開始落鹽果時唔好真係咁重手...
仲有去籽去得清D，唔係真係雪完會好澀。
想食濃味既可以加炸蒜同辣油~(但小心搞到同紅油抄手一樣味...)

(2) 菜飯
參考了 酪梨壽司 (click 入去有原食譜)
不過我的是懶人版本 (利申: 懶極都要切菜切左 45分鐘....(!)
又因為覺得再落肉會太滯，同埋媽媽果時煮唔落肉既....
(係我重點係好日劇既「想煮返媽媽既味道」)

步驟：
1. 先洗淨小棠菜(我買左半斤)，要小心洗根部既地方，勁多沙。
2. 小棠菜分開葉同莖，莖切粒、葉切絲~
3. 洗2嘜米，只用嘜半所需的水，開電掣，按電飯煲掣。
4. 燒熱油鑊，炒莖部的粒粒 (我講緊棵菜呀，focus!) ，炒到出水半透明，落半杯雞湯 (你有heart 可以自己煲...但我用史X生姐...)，再係咁意炒下D葉。
5. 將step 4 既野擺入電飯煲撈均佢~~如果覺得有少少生米，可以加多半杯雞湯再按多次cook
(因係隻隻米D 水都唔同......真係要觀察....同埋你知啦...有D人偏好食軟飯(爛 T^T) 架嘛...)
6. 煎完豬扒裝飯囉咩啫。

(3) 排骨....
呢個憑感覺咋...冇跟人呀~

步驟：
1. 無骨豬扒6塊解凍，用紙搾乾水，切 bite size。
2. 加 2湯匙生抽、一湯匙老抽、半茶匙糖、一堆白胡椒粉、大量五香粉 (要夠cover d 肉...我就係落少左...唔夠香)、麻油、生粉，醃2個鐘(過夜都得)。
3. 落油、燒熱 pan，煎肉。唔好狂反D肉呀，唔係佢個面做唔到caramelize 呢件事，個面唔香仲鎖唔到D肉汁，個肉唔juicy 架喇~
4. 見到個邊白色了就反啦~ 唔好一次落太多件... 會冇位...
5. 篤得穿D肉，就可以加椒鹽同辣椒 (不過我冇落) ，食得~~

Read More