[上水] 洪祖師擔仔麵

話說勾起條筋好想食滷肉飯，所以今日 Lunch 就去咗食滷肉飯了。其實呢間鋪既前身都係一間台式野，但果間難食到D飯好似漿糊咁，我幫襯過一次就冇再去，直至佢摺咗又再開返都係台灣野，我以為係同一間野換裝修，所以開咗成一年我都未去食過。無啦啦尋日搭小巴經過，睇清楚佢寫住咩百年老店度小月創始人，咁就畀個機會佢睇下好唔好食啦~~

香酥雞翼滷肉飯 $49

其實我諗咗好耐究竟叫市林排骨酥滷肉飯定呢個雞翼定係豬手肉躁撈麵.....(有選擇困難症嘅人係咁架喇...) 但由於未試過驚個滷肉汁太油膩，所以 ban 咗排骨酥同豬手，叫咗好難會難食嘅雞翼。

個飯一黎到，我就試隻雞翼先，一咬，外酥脆內軟滑，面頭嘅鹽酥調味剛剛好，唔會太咸，不過得三隻龜翼真係有D唔夠，搞到我爭 D 豁出去叫多個鹽酥雞。好彩，我用我嘅人性克服咗我嘅獸性，保持我嘅理性，都係等第次多個人多把口先至叫....

至於滷肉飯果部分，由於佢一早講明係台南口味，我 expect佢可能偏甜，但入口剛剛好喎。D滷肉粒粒分明，肥瘦好平均，再加埋個蔥花既爽脆同香味，仲有少少粘咀既果種經過長時間煮既效果，撈落個珍珠米度，搞到我好想食多碗。佢係台灣味道但唔係台灣價錢呢好可惜，食多碗會破產。睇返報導，原來佢係由台灣總店直接真空處理空運到港，好啦我原諒你有D貴啦。

加 $5有杯台式野飲，我揀咗仙草奶茶
作為一杯合格嘅仙草奶茶，有奶味、茶味同仙草味，熱屎辣辣 hur落去都咪話唔爽。不過都係果句，下次會叫少甜。




不過呢，佢開鋪時間有D 神奇，係有落場，下午3點至到6點係休息，之前openrice都話佢星期一休息，但我食呢一日正正係星期一黎，可能改咗時間啦。

推薦度: 推推推推 (最多5個) 但特登搭車過黎就3個半推。
地址: 上水馬會道 158 號地下