是日無聊之o雪o雪o雪Liza 與送水輝哥

今朝搭小巴...未去到個站已經有個麻甩仔望住我黎跑...
(係呀係平民版既「特登行早一個街口截人架的士」，冇分別架!!)
到我上車得返要將個人摺埋尾二果排果個位......(頂丫...我慢會冇位嘛...)
極眼訓...要將個人摺埋黎訓...

正當我同周大人纏綿緊既時候...
突然聽到後面勁大聲 "o雪...o雪o雪o雪" 食麵聲...
而同時仲有剪指甲啪啪聲....

後來o雪...o雪o雪o雪停左，就有一把師奶聲大聲講:「喂~我係Liza 呀~ 哎呀唔好意思嘈醒你添~冇呀~我想同你講件事我地會撤查(!)，哎呀我有野問你呀，你有冇唔開心呀。D錢我遲下畀返你啦~~不過呢，你畀公司鬧就要硬食架喇...」
(頂....嘈醒埋我囉妖)

然後同時又o雪...o雪o雪o雪同啪啪啪啪.....(真係有剪咁耐)
我繼續盅...

臨到屯門，Liza 又打畀個 friend：「我睇到個廣告，你有冇筆呀，屈Ｘ寺請人送水呀～月薪一萬一千六百蚊至一萬三千二百，都幾好丫可...電話係2XXXXXXXX....冇我諗起你個fd 阿雪個仔之嘛，係囉做大公司好，第時升做技術員都好丫嘛，冇野喇拜拜)

嘩，原來送水輝哥呢個人工...但...之前明明抗議不滿薪酬過低及人手不足...
同埋....輝哥有得升做技術員架咩???...............

(圖為輝哥 from google)

我被迫偷聽聽到一頭問號既時候...到站。

頂我見到後面個阿姐拎住個吉吉家外賣....個碗仲要整個反轉左。
估計佢響小巴上面生吞左一碗烏冬連湯 @@
而我繼續餓住咁行果條搞到我忍唔住要開遮既撒哈拉沙漠返centre打卡之路...

好啦...下晝去左九龍灣的萬人空巷
返黎果時...因為好攰...去左坐頭等...

頂......
有條友唔用耳筒睇80年代港產片...
點解咁肯定 80年代?
因為我聽到董驃把聲同勁假槍聲...(!)

Read More

Rachel Khoo

我愛吃也愛煮又熱愛英文(咳...)，所以也很愛看英國的飲食節目。
吊詭的是，香港的東西一般都不難吃，但飲食節目只限於叫我們出外消費再消費，食材要有幾名貴幾名貴，或者訕笑地獄廚神的鬧劇。
而要人生吞西洋菜*的國家，飲食節目卻超級好看！

色調、氛圍都在告訴你，煮食和吃飯都是一件快樂享受的事。

除了神級的 Jamie Oliver、Nigella Lawson 以外，最近發現 Rachel Khoo 的節目也很好看呀~

(from google)

一來被她那愉悅的聲線吸引、二來設定是小人陌生的法國菜、三來她是那種有肉地但又打扮得漂漂亮亮的女生，四來有花都風光(不過去到又係另一件事，可能當年太唔識野)，整個品牌設定好吸引。

只是一個爐頭和一台焗爐可以做法國菜喎!

而且她的廚房小小的，(我家的應該比她的大)，很貼近年輕人的生活模式。

節目名為：

The Little Paris Kitchen Cooking with Rachel Khoo
逢星期三 8pm Pearl 有得睇~

咳咳，其實喺youtube search Rachel Khoo 或者 little paris kitchen 都有冇字幕版睇，佢D 英文好易聽~ 你知啦，唔聽得耐英文真係會生鏽...T^T

但...香港天氣實在太熱著靚一靚煮飯真係會溶，唔知冬天叫我D 朋友仔上黎玩煮飯仔開party 會唔會有人join? 不過要買焗爐先~~

personal website: http://www.rachelkhoo.com/
facebook page: https://www.facebook.com/rkhooks

*生吃西洋菜乃當年於 Warwick 的飲食災難的佼佼者，host mum 當時奉上一整盤西洋菜及蛋黃醬一大枝...是為當日晚餐。醒目的小孩如我，在她的面前吃了一條生西洋菜後，即時加水把草掉入微波爐叮熟加鹽充饑...迄今四年，依然猶有餘悸。

Read More

青咖哩豬扒

好耐冇寫懶人煮食筆記
星期日，早放工，自然成為了家務天。
風球唔嫁又嫁最後不來，熱得天也火紅。
熱，想起在泰國旅行時買落既青咖喱醬，剛巧冰櫃有豬扒，唔係唔煮青咖哩豬扒吓嘛。
(嗯，我家冷凍庫長備急凍豬扒、雞翼和鯖魚，沒辦法，有時懶去買野嘛~佐治又不介意食急凍野~)

材料：
豬扒4 塊 (雞/牛都得)
茄子一條
青 咖哩醬(我真係是但買...但照計 made in Thailand 果D靠得住)
青醬 (pesto....係呀意粉果D呀...)
椰汁一盒 (印尼紙盒果隻!!! 街市買抵好多 !)
魚露 (er...我都係泰國買左....仲可以整醉雞)

要食到噴火咁辣可以再加辣椒。

做法：
1) 豬扒解凍，用廚房紙吸乾雪水 (我真係唔知唔吸乾會唔會勁大陣雪味...冇試過玩命)，切至 bite size。

2) 用白胡椒粉、鹽半茶匙、糖一茶匙、生抽一湯匙、魚露一湯匙、青醬一湯匙，與豬扒拌勻，醃一個鐘以上 (我醃左2個鐘~ 而落青醬既原因...係因為佢要落九層塔架嘛~ 但我屋企要出去老連咁遠先有得賣...咁明明青醬入面都係 basil 之嘛~ 嘿嘿，你懂的)

3) 茄子洗淨，臨煮先切，唔係黑晒。

4) 先落椰汁、咖哩醬大火炒香。

5) 下豬扒，炒熟，加一杯水。

6) 煮滾後加茄子，轉中火煮十五分鐘或至茄子稔身。

7) 試汁的味道，太辣加糖，唔夠鹹加魚露 (口味好個人架嘛~ 同埋隻隻咖哩醬個base 都有D 唔同...)

8) 一滴汁都唔好蹝呀~~ 撈飯/點麵包都得~~ 我食左2碗飯~

Read More

蘋果風月版停刊

三年前，畢業，一個人去完旅行返黎搵工既時間。
曾經，同同學仔 A先生講笑，既然我愛寫，就算做風月版我也會寫。
現在，風月版沒有了。
娛樂版勢將更多鹽花。

假如那年那天，真的做了雜誌intern 世界又會如何?
我只知不會有份寫那無數的書仔
默默地改變

不過，現在連風月版也沒有了......

Read More

爆

嗯，這個星期，有兩個爆點。

爆點一：爆炸糖

嘻嘻～身為彭浩翔的 fan (我由全職殺手一直關注....買兇拍人都係入戲院睇，咳咳)

冇理由唔睇低俗喜劇架~(我估到對白架...)
但講起都有少少火滾
開頭諗住搵麻甩系朋友們去睇，笑下咪算囉
無啦啦個討論題目由 dada 對波去左港產片之死
有條躝坦仲話彭浩翔有大片唔拍玩粗口
我當時係冇出聲費事嗌交

其實一句唔睇就罷就囉

扮咩野啫

有時笑下算數有咩咁大不了

下下大片真係會審美疲勞...

因為彭先生如果只拍大片，佢個獨特市場會冇左。

微絲細眼近乎生活係佢強項

其實今次都算係回歸原點，拍返瘋狂而又有D黑色幽默既故事。
無疑令惡趣味去左另一個表現方式

話就話低俗但其實都有文化意味：

1) 香港粵語、廣州粵語：和而不同
係呀，有唔同架！講粗口用字香港大多數係男性，廣州常用係女性。但一講，大家都知對方講緊乜，而明明又好似係唔同既系統黎架喎。

2) 方言入文
俹簁一part，係幽矯枉過正既人一默。而粵語係少有可以入文既方言。亦同時表現到中文既錯摸衍生出黎既幽默。
不過，我覺得如果楊千嬅係由李楓(下圖)做會更好笑....

好喇...似乎我又陷入左粵語文化之迷思....
不過我想講，當年學粵拼，真係lecture 有聽過粗口架~
因為粗口真係我地既語言特色，係好有趣既課題。
咁當然唔係學習重點 XD
諗下喺大眾既層面，當潮語不停變，而粗口大致上都係constant ，咁已經證明左喺文化上其實有一定既地位。

結論：係呀我粗口爛舌架~ 但我知幾時講得幾時唔講得 tune 到咪得囉~ 挑

______________________________________________________________________________

爆點二：爆 mon

係呀.......我部iphone 跌爆左個mon......=[

仲要響呢個咁尷尬既時間........
iphone 5......你幾時出呀?

是咁的，平時把iphone 袋褲袋， 事發係咁既...1) 落車

2)車開走

3) 問同行友人: E~我部電話呢?

4) 回頭

5) 馬路上，見到紅色一舊野好似電話...

6) 行過去執起

7) 我部電話呀 O_O (碎上) 

至於佢有冇畀小巴碌過，而家依然係一個謎 (回音)
而佢當時係正常用到架....

咁就以極速去3 開過張sim 用住 spare 電話先啦~
仲用透明膠紙密舖平面~以防佢 further 地爛

咁好啦，話說而家冇左whatsapp 會冇晒朋友架嘛
咁whatsapp 又其實support 某D nokia 機
見到whatsapp website 寫左 support 6700
嘩好野~我有部 6700 classic 喎~~~

好啦，geek 到爆咁又 update firmware 又搵 sis file 搞左一晚...
我屌丫，佢support 果部係6700 slide !!!!
浪費左我一晚時間呀!
打多隻字駛死咩妖!

而經過整定唔整買唔買過部等既一返掙扎...
最後都係放左佢....
問 C小姐借來 htc desire HD
然後專心等 iphone 5~~lalala~

講起又講講都唔信~
M小弟帶我去先達放左部碎mon iphone4
仲放到$2400 呀~
堅~~(都係儲起補返落買新電話條數架啦......喵)

結論： 又一次發現，有朋友真係好緊要！！！
多謝出機出腳骨出心出耳仔既朋友仔！！

Read More

Pattaya Floating Market

包了車從 mini siam 出發，印象中很快到達。
Floating market 是典型旅客必到的特式市集!
整個市場都是木造的! 充滿了橋、吊橋和穿洞的樓梯...
(但本人為落樓梯恐懼症患者....所以每次旅行總要有忍受小人下樓梯時龜速或要人攙扶.../_\)

暴曬了一個早上的小孩一進門就吃了杯花生冰淇淋~
可是，我懷疑泰國人熱得電解質長期不平衡...
真的甜得牙齒掉幾顆.....
還有那甜得頭皮發麻的海底椰汁....
(總之甜到懶屎...)



這條船的燒魷魚冇得輸，原始炭烤風味，加泰汁，寫的時候還在吞口水...
(不過...船不會動...是停在一點上做生意的啦...)




走得累了，兩名吃貨又再吃
冬蔭公、海南雞飯、魚蛋粉
味道還可以啦，但份量有點小。
邊吃邊在想，如果我跟仇人一同在這裡，踢他下水把他淹死絕對是負難度呀~
反正隨便一踢都會掉進河裡呀~~嘿嘿

膽固醇系列之鵪鶉蛋
那個姐姐不停在講電話....
加醬油和古月粉來吃，就是煎蛋囉...

蛋的旁邊是奶茶店

看上去好像很有名，人頭湧湧的說！

這個沒有過甜~
害我有衝動想要買那些茶葉回來..
但換算一下真的偏貴...T^T
最後還是到超市買即溶的泰式奶茶作罷...

 

都是看看那千人一面的商店
但那些牌子都是泰文，看不懂沒有買，買英文的又沒什麼意思...
(小姐你真難伺候)
有些竹子造的餐墊很美，以為走一圈後會找到
最後...消失了 T^T
還想用來做煮食文的背景嘛....
現在只好繼續用千人一面的IKEA 餐墊...嗚嗚
要買東西，看到喜歡就要買呀...不然會後悔得要死....

這個在橋上打泰拳令我想起小時候看歡樂今宵的碌滾筒環節呀~~~

這裡很人工地泰式，不過走走停停逛逛悠閒一下也不錯呀~

畢竟不是菜市場嘛...(這是我本來的想像....嗯...我是煮婦嘛...)

地址: 451/ 304 Moo 12, Sukhumvi-Road Pattaya

網址:http://www.pattayafloatingmarket.com
(佢個map勁到教埋人地由曼谷去芭堤雅架~~堅揪呀)
仲有...有得玩果個吊全條纜索飛下飛下果個野...同埋響個波入面扮倉鼠跑....
(我冇玩，淨食 XD)

________________________________________________________________________

最後有冷笑話知識分享一則，請看下圖。

where is the 笑點?

之唔係同我講番梘唔係chemical....
仲要google translate 不要化學
你都好化學下喎.....
地球上冇一樣物質唔係由元素組成架喎....(拿..著火都係化學反應)

化學小知識:  saponification
用平常人既講法就係油加哥士的加熱出黎既一舊舊就係皂喇...
基本上所有叫soap 既野都係同一樣既作用黎帶走油份...
所以番梘不要化學同 no Chemical 呢個statement 真係睇到我當時笑左出黎~

Read More

心

一筆又一筆，一畫又一畫。

這是一顆在冷凍房的夏天的心。

畫呀畫，畫呀畫。
這是一顆從黑色而來的心。
下次畫一顆紅黑紅紅黑的...
心。

像我的心。

Read More