小幽小默, 齮齮齕齕!

2015年8月1日 星期六

[粉嶺] Bittersweet Cafe (Ver. 2)

晚上7:04 Posted by 嘈 , No comments
我住喺充滿水貨客、藥房同金鋪既北區,cafe 既選擇其實少之又少,一係就貴過九龍價。咁啱友人M喺聯和墟發現有間茶記價錢,但質素同味道都唔錯既cafe~ 因為素有美食雷達之稱既M已經連續幾日去呢間cafe食lunch + tea,視之為飯堂,本來星期六打算毒在家煲oh 我的鬼神君既我都放棄煲劇行出家門,會一會呢間小店。

靚靚 menu~


呢個All day breakfast 賣相好靚仔,post 上fb 呃like 一流。
等得有少少耐都有主動講唔好意思。
多士可以轉pancake /牛角包,雖然個pancake 有少少硬同少少乾,如果熱D 同 fluffy D就perfect池。
煙肉剛剛好,唔乾唔柴。
個腸腸冇平時既豬肉腥味,很好,如果係白色果隻腸會更好。
個牛奶滑蛋堅係好滑,blend 埋個香草同即磨黑椒真係hola幸福~~
成個早餐既重點係個糖漿,hola有heart咁係蜜糖黎架!
而呢個咁有heart 既早餐只係五十五蚊...
我屋企樓下老茶食個時菜肉片飯都要42仲要冇野飲
嗚呀~~~老闆你會唔會太好人 *心心*


sor~ 倒影到我對肥肥手
係呀跟餐有咖啡or 熱古古力,由於我要戒咖啡我係揀左熱古古力
原來我嗌得太快,有decaf 的 :( 
你睇下D 奶泡個剛剛好就知佢有heart 啦
仲有仲有佢連凍咖啡都係用 Bodum double wall glass,我冇野好講喇。

讚左咁耐有道唔好,個鋪位實在太細,無得拎住本書自拍做偽文青打卡呃like :( (其實都勉強可以既,門口位係可以做到呢樣野~)

地址:
粉嶺聯和墟和豐街和豐閣4號地下(欽記隔離)

________________________________________________________________

某日又去左一次食 tea

今次叫左三文魚 bagel



個bagel 好香 poppy seed 味,佢澎湃到同我隻肥手板一樣咁厚,外脆內軟,最後我都係就咁落手用口咬XD
三文魚落得好豪氣。
但如果唔係沙律醬係 cream cheese 就更加歡樂。

是日切餅係 tiramisu

少甜,好滑,好味。個層次都做到分明,又唔會太濕身,不錯吃。



終於破戒試左個 latte,D 奶泡真係不得了,不過個豆係大眾口味豆,普通,但好飲過星記已經好好。我仲偷左友人杯榛子朱古力一啖,好明顯係死小孩口味,忍唔住了佢D棉花糖 XD

我去左兩次都係友人請客,唔好以為我做打手。

2015年7月30日 星期四

驚到呢…


如果,有一日夜媽媽行緊返屋企,你發現眼尾有個白影。你轉左,佢行左。你轉右,個影又行右。急步跑返屋企,個白影仲係一直跟住你呀!

呢個時候嘅你,可能冇喺哈佬喂嗰時玩鬼屋嗰個驚喎!驚都有唔同嘅層次嘛!平時我哋會講:「嘩!好驚呀!」、「驚到人哋個心卜卜咁跳呀!」、「驚到企咗喺度!」同埋「我驚到標s!」表達不同程度嘅驚嚇。

之不過咁,當大家講英文唔同層次嘅驚呢,又好似難度咗少少… (除咗 I’m afraid.  I’m scared. 仲有咩?諗吓啦)

見係你哋,醒三個生動啲形容「驚嚇」嘅 phrases 畀大家啦~!

Scared stiff 係就係有 scared 仲要驚到硬晒呔!
Shaking like a leaf 震到好似落葉。
Send shivers up and down my spine 直譯,由脊柱上下傳啲冷震出嚟,咪即係驚到震囉!


啊!咁上面個白影係咩嚟呀?(震音)

你個 friend 叫… Johnny


孔子,字仲尼。(洋名 Johnny。) 又其實,Johnny 可以組成其他 phrases….

當 Johnny 唱歌嘅時候,若然佢只係唱一個音...唱極都係嗰個音...唱到你煩,你悶,你躁!咁佢就係 one note Johnny。而其實 one note Johnny 呢個 term 就係講緊一啲「講嚟講去三幅被」嘅人,同一件事同一樣嘢可以講到 2046....

而喺 spotlight 下嘅 Johnny ,無論嚮咩地方,都好似漆黑中嘅螢火蟲一樣,咁鮮明,咁出眾!所以 Johnny on the spot 就係一啲有事時突然出現,拯救人脫離難題嘅人。

Johnny 聽得,睇得,仲玩得添! Johnny on the pony,有隻馬仔,仲可玩乜?

嘿嘿,咪就係騎。膊。馬囉!

“Goodest English”


喺網絡上面,好多時都會見到有人笑人英文奇差。呢個時候,巴/絲打們就會用 “goodest English” 呢個 term 洗版,意思係諷刺某人的英文「超好」,呢個 term 係有段故嘅。

喺 George Orwell 嘅小說 《1984》入面嘅新語 (Newspeak),喺嗰個世界入面,詞彙只會越來越少,大量詞彙及文法被簡化、取代或取消。 Newspeak 不會再有 bad,由 ungood 取代。而 better 就會變成 gooder,best 變成 goodest。不會再有 great,取而代之是 plusgood。Excellent 則是 doubleplusgood。呢一種二分概念久而久之會令人失去批判力,答話傾向只用 “Yes” 來表達。

而現實社會中,政治正確的詞彙,也有著新語的意味。例如以往 physically handicapped (殘廢),改為 physically challenged (身體障礙) 、 physical clashes (肢體衝突) 取代了 brawl (毆鬥)。雖然部分政治正確詞彙是為了保護弱勢、中立觀點,但有時候這些詞彙亦是為了某些政治目的而出現。

疊韻詞

(Credit: 毛記電視cap圖)

葉蘊儀,呀唔係,疊韻詞,即係以相近的發音組成疊詞組,令字詞更活潑生動。中文入面,運用疊韻的地上最強都莫過於李清照嘅 《聲聲慢》……. 尋尋覓覓。冷冷清清。淒淒慘慘戚戚。

咁英文都有呢類咁嘅疊韻詞,一路讀出嚟都覺得自己親切啲、友善啲、跳脫啲。

試讀出以下說話:

喂!我同佢 buddy-buddy (一場老友) 見佢打波技術咁 so-so (平平無奇),咁梗係要教佢啦!打波先嚟 drizzle-dazzle 㗎!(即係打波先黎落雨㗎!)

係咪好親切、友善同埋跳脫呢?

除咗上面嗰啲字,見你咁識貨贈多你兩個易用嘅疊韻詞喇!

1) Wishy-washy  (形容猶豫不決、無特別)
Don't be wishy-washy; you can't go wrong by listening to what I say.
唔好咁優柔寡斷喇,你聽我講就冇錯㗎喇。

2) Helter-skelter      (形容狼狽、手忙腳亂、混亂)
之前澤尻有齣《整容天后》,咁入面就有講好多個樣整過龍又會 keep 唔耐….個樣好「混亂」咁….

It is a helter-skelter dash to meet the deadline.

呢次係臨 deadline 匆忙的趕工。

你個friend 叫… Jack


上次講完阿 Joe,今次講阿 Jack 先~!

我相信,阿 Jack 係咁多個有特別意思嘅名最多解釋嘅一個。(不過,多數都係幾負面…)

名詞方面,平時阿 Jack 除咗係一個男人/仔/生,佢仲可以係一台千。斤。頂。呢~用嚟整起架車換呔嗰舊咪就係。而如果嗰個阿 Jack 幫你屋企裝修而佢全名係叫jack-of-all-trades 嘅,你就要小心喇!因為,呢件正一「張張刀無張利呀」!


動詞方面,當阿 Jack 先生係 know jack about 嘅時候係代表緊佢咩都唔識咩都唔知。就好似阿 Jack 佢對住個電腦連防毒軟件都唔識裝。用英文可以講 Jack does not know jack about Internet security.  (Jack 對網絡安全一無所知。)


喂,不過,如果你識嗰個阿 Jack 係一個成日講嘢唔收制口水多過浪花嘅。你頂唔住就叫佢「收聲」算喇,唔好學 Do Do 姐叫佢 “off” 呀!反檯都似!原因… 嘿嘿嘿,不解釋。

動物農莊


其實,我哋嘅世界係住滿咗各樣嘅動物!好似講緊廢話,但係,形容啲岩巉嘅人呀,都叫佢野獸派啦… 仲有仲有,貌甚寢*嘅女子,世俗嘅目光又叫佢哋咩先?你講!你講呀!你好講喇喎!個詞咪又係動物!!!

好喇,有一班年青人放 lunch break 之前大叫:「而家我話畀你聽呀!我呀,食得落隻牛呀!」(咳,有某助教成日都咁講…)吓?咁食得落隻牛嘅英文係咩呀?

嗯,有呀! Eat like a horse. 食好多好多嘢。

咁呢… 有冇飲到貓㗎?我個 friend 阿 Peter個個星期六都飲到貓晒㗎!如果用英文又會點㗎?

如果你呢個時候仲有人性嘅,可以同 Peter 講, I worry about you, Peter; you drink like a fish.  (意思係:喂 Peter 你咁飲法,我好擔心你呀!)

不過,我諗香港打工仔最常講嘅一句,都莫過於「攰到隻狗咁!」( dog-tired) 同埋「我過緊唔似人嘅生活」 (It’s a dogs life.)。

都係果句啦… “All animals are equal, but some animals are more equal than others.” 所有動物平等,但有些動物比其他的更平等。


*貌甚寢即文言文嘅「樣衰」