下回預告

我要寫返晒去芭堤雅同曼谷既遊記！
我話既！

Read More

神奇的Annual Dinner

明明勁多野做但都係死左黎寫blog。

嗯，默唸咒語「你睇我唔到~你睇我唔到~~!」

話說，今年公司獻新猶，Annual Dinner 去澳門喎~

一早起身出碼頭，痴線地差D遲到。
(不過，有一堆好同事係以末路狂奔既姿態出現，髻都差D甩果隻...)

由於趕時間關係，呢個人夠膽死帶住的士錢$140蚊葡幣再加$50蚊港紙上船(!)。

是咁的，由於澳門乃母親大人出生之地，市區一帶真係冇特別...開頭仲以為眾人各有各搵食，差D訂咗雷擊系列之米芝芝三星星的Lunch (!)。後來知道集體行動呢...

好地地氹仔上岸...
好地地鬼咁大浪...
好地地勁多人暈浪....
(我係果D臨掛八號風球趕船返黎好似玩海盜船咁我都冇事仲可以食杯麵的死小孩~)

個幾鐘，真係去台北都得......
氹仔碼頭極簡陋=_= ，是Q但去左間叫山度士葡式餐廳既物體。

由於有十幾隻餓狗既關係...係影唔切相既.....
因為手快有手慢冇！
之但係間野Ｄ碟頭算細，另外我好掛住漁人碼頭果間pizza (真係好X好食!!!用人頭保證。)
Sangria 好難唔好飲，個乳豬ok，鴨飯幾好(但食到....2啖咋 T^T)

佢個葡國雞稀過水，馬介休炒雜菜係烚．菜．加．烚．咸魚囉唔該！

（冇圖呀，因為我好專心咁爭食!!!)

之但係呢.....如果要正正經經食既都係去返船屋/法蘭度/沙利文啦..........

特別鳴謝天王大人贊助饑餓兒童午餐~!!

同埋我好掛住九記D雪糕............. T^T

又由於係 Annual Dinner 的關係，本人比較關心自己個樣...(頂我朝早口腫面腫咁出門口架.....) 

勁好彩有隔離 team 同事 stay behind 訂左房，食左榴槤雪糕加可樂 (呢個人好重口味呀....!!!)同埋 R小姐食完個滔滔魚翅湯就去左人地酒店執好個樣了~

Conrad 間房好靚，有埋 nespresso！(好想玩但唔好意思........)不過係遠左D......例如走果時冇的士....搭完 shuttle bus 出金沙再轉的士..........又因為 Dinner 於某酒店舉行，著靚少少是常識吧！

點知，一入去，中伏！Overdress 仲要遲到 =_=|||
心諗，我頂呀，早知唔帶衫唔換啦頂!
(係呀係上一篇果條呀！！）
即係著到似去老蘭但其實去左蘭花酒樓呀................
仲要同個 backdrop 仲要同 Santino 撞色 (!#@@#$%@!%@#%$!)

真係柒到想搵窿捐...........下次都係著返黑色....................

(個圖我喺公司個fb 搵返的，另外原來上年畀人影左好多勁樣衰既相.....................另外....我冇搵Santino 合照的.........真係撞到應一應呀個electric blue..............=___=|||||)

柒事停不了，全個場好食既野係有麵包、tiramisu同....西瓜。
(我冒生命危險寫架.....間野我唔開名喇至多....)

唯有寄望抽獎啦......

Teammate 們接連中獎，包括有錢。(嗯，xbox 畀D姐姐中左.....)

最好笑係有一個 team mate 中獎時去左洗手間，另一個同事焗住冒認中獎者仲連戲地用中獎同事的資料自我介紹，而灰暗地....代領同事最後係食白果的。

正當抽得七七八八 (因為每年都唔知幾時抽完的...)本人心灰意冷之下講咗句：「妖，毛都冇條！」下一秒，就中左喇！～～咳咳，而我個袋得廿蚊葡幣加50蚊港紙。

呢個故事教訓大家，口賤未必係壞事黎架~~!

雖然被人狂笑我「痴地」....之但係我其實著左corporate colour上身喎~ 哼。
而條裙同對鞋已被我封為 Lucky 裙同 Lucky 鞋！

Read More

時裝災難之胸戰

喂，唔知有冇男讀者，尷尬既敬請期待下一篇《神奇的annual dinner》。

看到題目，如果有留意在下真身是一枚plus size 中堅女子者，可能會問，plus size 都要胸戰?! 咁仲成世界?

係...要。
因為我唔小心行咗一條不歸路，上咗asos.com 訂裙。

我訂咗呢條，好靚呀可~

我著左去公司annual dinner 架~~

之但係....因為我個size 咁啱in between 2個size，咁身為怕買完唔著得落協會會員，揀大一個size 是常識吧.....就係因為大左呢個size......我.......計漏左一個事實。呢件衫係loose cut......再加上D鬼婆個胸寧舍...(        人        )..........

收到，試衫。

頂，我個胸唔夠大撐唔起件衫....

我做左廿幾年人第一次覺得自己原來唔夠大!

好大打擊呀......(回音)

苦惱左2日...個胸唔夠大撐唔起呢條裙呢個問題都唔知可以點解決....

(好...其實其他人係唔覺架...但我個心好不安....因為我好鐘意條裙呀.....又例如平均我應該一年只會著兩次裙...)

咁某日在姊妹們飯局行街期間...忍唔住問可以點算...

行動派的友人兩名立即帶我去看 nude bra (!)

期間大開眼界！

唔只兩個就咁痴上去，仲有好多款@@

就算就咁一個墊都有三百個形狀同二百種物料配合不同胸型的需要！

但...小人真是接受不了nude bra ....

可能真的因為看過太多有關nude bra 的惡趣味笑話...

default 地覺得砵仔糕係用黎跌既..........

退而求其次，去了看push  up bra。

我頂....

個push 都有好多個方向......
向上、置中、2 size up都有...............

一試....

不得了
原來個胸既比例係會嚴重影響手臂外觀。

即係本人手臂在比例上係奇粗(前提係冇一個地方幼)

當個up push 左之後呢...

手臂個比例唔同左!!!

嘩! 呢個打擊真係久久不能釋懷呀............

口賤的某位大小姐，見到平胸打擊後本人面露的灰暗表情...
更加落井下石...話上我身果隻係好似貧窮神既平胸神....T^T

圖為貧窮神....

不過，某大小姐都唔係真係好口賤啫....
因為我諗到係...貧乳神呀....sosad

Read More

椰子奶凍

又到了甜品系列~ (幾時開的?...)
今次真的是白痴也懂的甜點呀~
大家總有試過弄果凍唄~
不就是打開包裝、加熱水、攪拌、倒入小杯、待涼、放雪櫃、食，共七個步驟。

這個椰子奶凍也差不多呀~
就是打開一盒椰汁、一小盒牛奶的包裝、加四匙糖、開火、小火煮沸。
另外用少許水開2小匙魚膠粉，等它們吸飽水倒進椰奶裡。
然後攪拌、倒入小杯、待涼、放雪櫃、食而已~
不過不要心急，一定要放涼才入雪櫃，否則會皺起唔靚仔~(見上圖...)
而椰汁我強力推薦Kara 佳樂牌，真的比其他品牌香!!!

這又是款式多變的基本甜點呢~
如果加西米，就是椰汁西米凍。
如果加上芒果味jelly (和果肉)，就是芒椰奶凍。
如果加上菠蘿jelly (及菠蘿肉)，就是 pina colada mousse 的簡易版了。

熱死了的時候一流~~~呵呵！

Read More

史上最強夏日化妝品

十八歲以前，我是一個就算看見雪花膏也會嗤之以鼻的野孩子。在中六的時候，突然覺得要回復女兒身 (!)，於是學起化妝來。

記得第一次買的化妝品是 Shiseido 已停產的PN眼影。

由於本人骨骼精奇，汗腺只長在臉上(冬天也沒差....除非十度)。加上office 氣氛跟在家一樣(去到一個女同事只要化妝就代表了那天有約的地步......)，久而久之嫌煩由比較濃眼影變成素顏獸。

但...我心情好還是會化妝的。

選化妝品的條件很簡單，薄，防汗。

我只是蟻級blogger，以上產品皆是自費，誠意推薦給「大汗」們。(絕對歡迎找我試用 T^T )
圖中經過實驗證明，看完 Lady gaga 喝了酒，跳了一整晚，妝容依然完．好．無．缺。

(左後排起)

無印碎粉
看vivi 推介，這種是沒有閃粉的。勁平，當時買 $58，性價比超高的說。定妝一流。
另有兩種有閃的。但本人面大，走歐美風，頂唔順任何閃的粉底妝物。
仲有一包包refill，可以做環保小先鋒。

Shuumura mousse make up base 01
薄如無物，防水防曬，均勻膚色，用「一次性」海棉印上，乾手淨腳。
不過小心唧得過多。

Mabelline gel eye shawdow
同類中佢最平 $48，唯有忍佢有閃。
用dap 的手法上色，如用完這個才畫眼線或眼影，再加碎粉定妝。
唔加碎粉？未試過唔敢搏，因為我真係好大汗會溶。

Benefit Benetint 
皇牌胭脂水，因為本人為冷色系人，選了深紅。平常人建議用粉紅。
有時用來當lip colour 也行。懶人要有好氣息必備。

Clinque chubby lip stick
紅色，無香味，介乎lip gloss 同lip stick 質地，專櫃來說算便宜，$14X。

指甲油 in 撞色 tone
因為性格playful，我的指甲也很playful。
不過只限 紅、藍、黑、金、銀。
但這幾種色調已經夠我玩。

(左前排起) 
Lancome 眼影
卓記$30 拾回來的sample，earth tone，四色，用完應會回購正價。因為真的很顯色，而且一點也不閃。(強調，我走歐美風。)

Loreal double extension mascara
一枝包括了base 及mascara，輕身。如果睫毛本身夠長(如本人)，用後不得了。
熱到瘋哭到歇斯底里也沒有黑色粒粒掉下來，易卸。即時有神眼大。
但我只刷上睫毛，下睫毛都刷會太像妖物。

如果有大事件，我才會用bronzer 、遮瘕、厚眼線。畢竟我是一個有雀斑的大面人，而且拍照的妝會自動變淡。
但上面那些產品已經夠我愉愉快快約會去~~

Read More

FUN.

咳咳，本人由第一隻碟已經聽，然後居然聽到903在播，然後google 發現呢隊band 響美國突然紅到不得了。之但係香港好似冇乜人提咁 T^T

講返點解我好地地識呢隊band 先。
話說，係因為iphone打tap tap revenge ...



咁聽到有隻歌個beat 好好un，而個主音把聲係果D高高地音既男人聲，不停狂loop wor~
第一隻識佢地既歌係 All the pretty girls



個mv 又好好玩喎~
雖然隊band 係來自 New York，但係，佢又唔係好美國喎。
於是搵左成隻碟黎聽~
成隻碟至鍾意果隻歌係呢隻 Be Calm


由於本人唔知點解好鍾意有弦樂既arrangement....
所以狂loop......
加上阿主音 Nate Ruess 真係唱得D感情收放好有musical 既感覺
而佢又好放喎
總之成隻 Aim & Ignite 都好正能量~~好playful，而曲風係blend 到乜都有，er...例如係pop 底，folk 又有rock 又有musical 又有，連．手．風．琴．都有...(!)但係又好夾 ~

好loop 左成隻碟好耐，但係呢...做咩事 FUN. 會突然紅到呢個地步呢?

原來....Glee 拎左隻 We Are Young 黎唱，superbowl 時某車品牌用左呢隻歌做BGM....
仲連 Gossip Girl Season 5 完既時候都用黎做 BGM.....
成件事.....好難唔紅。
我估...如果早排響美國，應該同 08年成個歐洲都播 Duffy 隻 Mercy一樣咁得人驚。



不過我真係因為2月果時太冇心情連歌都冇聽....
我到5月頭響收音機 (!) (因為office唔知點解keep 住開...)聽到E 乜把聲咁熟既 (因為真係好signature) 先知佢地好紅...........
今次 Some Night 呢隻碟個起伏都好大，好似夜晚去玩然後虛起上黎咁。
而mood 方面放得更大，聽落好有musical 既感覺。
曲風都係乜都有，D beat 再比上一隻更鮮明，睇訪問話因為受hip pop影響喎。
明顯地，Nate既唱因為arrangement 舖排既層次豐富咗而更有爆炸力，更powerful！

不過隻some night intro 又真係好好玩 XDXDXD


youtube 既comment 仲話Nate 令人諗起 Queen 既主音Freddie Mercury
聽吓咪知囉~~

題外話，Lady Gaga 就係因為呢隻歌而叫 Lady Gaga。不過，佢個紅絕對係另一回事。
題外話 (2) 瘦仔真係可以學下 Nate 著衫，我覺得佢個"士die 佬"都幾好睇。
題外話 (3) 由於佢地同 LGBT rights 既組織合作，於是主音被懷疑係 gay，但無source 證實。

Have FUN. ~!
http://www.ournameisfun.com/

Read More

木糠布甸 Serradura

Serradura (音: 射喇du 拿)出自葡文，即木碎。
有指是澳門人發明。

由於屋企樓下餅店賣的木糠布甸奇難食，D cream 稀過水又冇奶味，把心一橫自己整。
然後發現，我可以昆人，我整甜品唔錯架~
等我之後可以扮 sweet sweet 小姐。

材料：（超市可以買到~ 不過whipped cream 好似某D 烘焙店平D )

1) Whipped cream 一小盒
2) 煉奶 幾羹
3) 瑪利餅
4) 牛油 (optional)
5) Vanilla Essence  半蓋
6) 手臂 (唔係《心戰》入面果隻呀下.....)

做法：

1) 將大量瑪莉餅擺入保鮮袋，然後用所有暴力方法整碎佢至粉狀。 (咳...可以優雅咁用麵棍既....但我貪玩)
2) 叮一分鐘溶牛油一大舊。
3) 牛油撈餅碎。(所以擺保鮮袋囉...均D嘛，但如果好X怕肥...唔落都得既...落少少水冇咁香囉)
4) 洗乾淨個碗同打蛋器，抹到一．滴．水．都．唔．可．以．有。如果唔係打唔起D cream 咁就仆街過塌皮喇。 (唔好提，我用緊隻大通花瓷碗做mixing bowl........)
5) 用手臂一條或兩條怒fark D 由雪櫃拎出黎既cream。
6) Fark到咁上下呢，見佢杰杰地就加煉奶同Vanilla Essence入去。(可以撈均試下夠唔夠甜)
7) 繼續用手臂一條或兩條怒fark。fark到似軟雪糕咁。
8) 梅花間竹，一層餅一層cream until filled your container。
9) 雪佢2個鐘 (我雪左一晚)

哈哈哈，我兩朝都食左木糠布甸做早餐，仲有drip coffee，幸福到好過份。
如果用電打蛋器可以慳返條手臂囉~~~嘻嘻

又如果，加D 朱古力醬呀，用oreo 呀，咁咪古古力木糠布甸囉。
又或者，加D 綠茶粉/ 精，用綠茶餅呀，咁咪綠茶木糠布甸囉。
讓我們用茶餐廳 formula 無限上綱吧~嘿嘿~

Read More