原來法國菜很XL - 陸以心

向來都好鍾意睇遊記，不過叫我寫呢....十次有十次唔係爛尾就會一係冇心機。呢一方面我好港女，影左買左睇左就寫唔返出黎。應該係懶到爆先會咁~

呢本書係隨手本來喺圖書館睇緊食譜既時候見到，原來圖書館分書好抵死，佢個書名同野食有關呢就會擺左喺食譜果邊架喇~

以前睇蘋果有睇陸以心專欄，覺得呢個女仔枝筆賤賤地，又幾好笑所以有睇開~我記憶入面係 hocc果個專欄既前身就係陸以心。不過我會睇都係因為彭浩翔 順手會睇XD

呢本書分左做兩part，巴黎同埋Dijon，重點都係巴黎果 part~ *膚淺* 鬼咩我識 Dijon 芥辣囉好未~~~所以零代入。老老豆豆我去左兩次巴黎，第一次年代太久遠再加唔係自己plan，我只記得喺塞納河邊扮寫野，同埋喺鐵塔下面野餐食左個又凍又貴又硬既火腿芝士法包。第二次去我都係亂黎，係咁去美術館，musee de orsay 前面食住crepe咁排隊買飛被當法國佬售票員係concession 。不過留意返我去左兩次都係冇入過羅浮宮，同冇去凡爾塞宮。我寧願對住 the thinker同地獄之門發呆，所以我懷疑除左第時好返自己再去都幾難有條友咁同我去巴黎 hea。

To be honest, 唔好expect 呢本書入面寫食會寫到有幾出色，反而寫佢D friend，寫佢ex 果D部分係幾好睇。女仔友情得來不易，仲要 long d 既女仔 fd都真係幾難得。同埋佢08年已經問緊身份認同呢個問題，我身處有死小孩大聲講普通話既自修室都不禁打了一個突。

又到左發白日夢既時間，如果呢一刻叫我再寫一本書出黎，究竟會係咩題材呢? 情緒病? 補習班血淚史? 我在投注的日子? 不過認真，有一樣我真係寫得唔好睇同埋寫完會無人睇。

(highlight 見答案)

情史! XDXDXDXDhahahahahahahahhahhaha

*完* 達哥tone~

Read More

賣花打

由於早幾日係父親節既關係，所以寫下我阿爸Mr George。

其實，我爸對於教育本人怕且係零心得。佢唯一做得啱既地方，就係採取「積極不干預」政策，原因係佢覺得佢唔識，而我會識處理，所以佢唔駛理。*跳起yeah~~*事無大小，阿媽在生既時候阿媽理，到而家就掉晒畀我理....所以有時佢因為太過積極地不干預任何煩到/ 佢覺得煩既事，有廿九幾年既時間我都係覺得老豆唔多理我/ 屋企既野。但而家對得佢多左，好明顯佢真心覺得太煩(例如煮食同洗廁所)，而真係會完全唔理由得佢自生自滅。

除左畀太多自由我之外，我老豆既另一特點係會預早超多時間出門口做任何既野，例如出街食飯或者係之前探我病咁。會預多一個 double 咁上下。如果我學到佢一半既功力，足以令我成為一個超越守時既人類。但佢對於時間長度既概念係好令人費解。例如佢會覺得，半個鐘由上水去沙田係好快，明明就係正常速度。又例如之前每日兩點半探我咁，佢係經常話人地未開門畀佢探就已經到左仲等左好耐。咁我問返佢預到啲時間咁鬆係用來幹甚麼，佢答我除左預火車會壞，仲會預黎痾尿(!)

另外仲有一個關於 Mr George既小笑話一則~~~話說佢未退休前，係一個油漆師父黎既。咁以前出世紙/ 手冊咪要寫阿爸阿媽職業架嘛。嘩，我張出世紙呢，一拎已經勁有藝術氣息，因為阿爸職業果欄係寫 P。A。I。N。T。E。R。*--畫家是也。所以我有理由相信同懷疑我對顏色既觸覺係來自我爸~~ yeah~

*油漆佬既英文應該叫 painting worker 啦~

Read More

請勿飲食、睡覺或吸煙

養病的日子百無了賴，屋企超熱，日日都三十幾度。想慳冷氣錢，唯有坐喺自修室睇書玩電話涼冷氣寫字恰眼訓。

由於未適應藥物既關係，基本上我呆到好簡單既野都可以做唔到，工就更加返唔到。攞正牌無目標咁放假既感覺係好差好差。都係果句，孤獨好難捱。

或者我應該用呢段時間寫多D野，令自己有寄託，讀書報告又好，心情紀錄又好，總之寫左先算。其實呢段時間我不停咁諗，除去左咁多個tag，對所有事無晒興趣既廢人mode，我呢個人仲留低D乜野價值呢?

坐喺自修室對住個規則既時候，終於有一刻我係一如以往咁諗埋晒D無謂野，就係，究竟咩logic 既人會將飲食、睡覺同吸煙用個或字link 埋一齊既呢? 因為三樣野都係控制唔到? 又唔係丫~肚餓飲野眼訓同煙癮都係可以忍架喎。定係純粹覺得或同or 一樣用黎求其將幾樣唔啦更既野擺埋一齊咁就任務完成呢~~

其實喺寫野既呢一個毛聞，我真係好眼訓。但之前試過下晝訓得太多，結果夜晚眼光光碌左十世先訓到。所以日頭白白要搵D野occupied 自己令自己咪訓咁多。不過呢，冷氣再加咁靜既環境令人想訓係hola正常的。

btw 我而家晚晚11點前會訓覺....過住退休既生活。繼續希望快D好返。

Read More

The harder I try...

自從發現自己有bipolar....
而家係抑鬱期入面之後
幾乎無一日唔喊
分別係喊得出同喊到喊唔出

食完藥得個呆字
就好似要將所有人應該有既感情, 一個人應該有既希望同動力一一咁淘空晒
而家既我就好似得返個殼咁
可能仲衰過借屍還陽

發呆發呆再發呆
終於明點解會有人病到想自殺
因為果種孤獨既窒息感係可以大到吞噬一切
(放心，我係殼黎，未會行呢一步。)

工又返唔到，飯都就黎煮唔到。
對一切熱愛既野都失去興趣。
唔好話乜，我根本連飯都唔想食。
只係日日被父親大人鵝住望住唯有食飯。

我唔知咁樣D抑鬱藥叫有效定無效。
書又唔想睇，甜野食完又係唔得。
根本個人開心唔到。
睇開D睇開D睇開D
咁EFG呢?

做香港人真係唔好病，尤其係情緒病。
再加上我係一個手停口停既香港人。
點睇開呀???

Read More